ინგლისური “მანჩესტერ იუნაიტედის” მთავარმა მწვრთნელმა ალექს ფერგიუსონმა პრემიერლიგის 34-ე ტურში “არსენალთან” 2:1 მოგებული მატჩის შემდეგ არსენ ვენგერის გუნდს თამაში მოუწონა და აღნიშნა, რომ მოწინააღმდეგეს არ გაუმართლა.
ამის შესახებ Sky sports-ი იტყობინება.
“მატჩის პირველი ტაიმი “არსენალმა” კარგად ჩაატარა, ჩვენ კი არადამაჯერებლად გამოვიყურებოდით. ჩვენს გუნდს თავდაჯერება არ ეტყობოდა და მოუთმენლად ველოდი შესვენებას, რათა მდგომარეობა შემეცვალა. გოლის გაშვებამ კი ჩვენზე დადებითად იმოქმედა. რუნის ჰეთ-თრიკის შესრულებაც შეეძლო, თუმცა, ჩვენს მოწინააღმდეგესაც ჰქონდა კარგი მომენტები. ჩემი აზრით, “არსენალს” არ გაუმართლა, ამ გუნდს თავი არ დაუზოგავს, მაგრამ გამარჯვება ჩვენ დაგვრჩა” - განაცხადა ფერგიუსონმა.
“მანჩესტერ იუნაიტედმა”, რომელიც ინგლისის ჩემპიონატის გათამაშების ცხრილს სათავეში უდგას, 34-ე ტურში გამარჯვებით მე-3 ადგილზე მყოფ “არსენალთან” უპირატესობა 9 ქულამდე გაზარდა.

ლონდონის “არსენალის” მთავარმა მწვრთნელმა არსენ ვენგერმა ინგლისის ჩემპიონატის 34-ე ტურში “მანჩესტერ იუნაიტედთან” 1:2 განცდილი მარცხის შემდეგ აღიარა, რომ მისი გუნდი ჩემპიონის ტიტულისთვის ბრძოლას გამოეთიშა.
ამის შესახებ Sportinglife-ი იტყობინება.
“გუნდმა კლასი და მებრძოლი სულისკვეთება გამოავლინა, რითაც შეგვიძლია ვიამაყოთ. საკმაოდ ბევრი საგოლე მომენტი გვქონდა, მაგრამ ისევ არ გაგვიმართლა. საერთოდ კი, “არსენალს” უიღბლობა ბოლო ორი თვეა თან სდევს. სამწუხაროდ, უნდა ვაღიაროთ, რომ საჩემპიონო რბოლას გამოვეთიშეთ” - განაცხადა ფრანგმა სპეციალისტმა, რომლის გუნდი ჩემპიონატის დასრულებამდე 4 ტურით ადრე ლიდერ “მანჩესტერ იუნაიტედს” 9  ქულით ჩამორჩება.