ინგლისური “მანჩესტერ იუნაიტედის” მთავარი მწვრთნელი ალექს ფერგიუსონი, “რომასთან” ჩემპიონთა ლიგის 1/4-ფინალური ეტაპის პირველი მატჩის წინ აცხადებს, რომ მის გუნდს, სასურველი შედეგის მისაღწევად, შესაძლებლობების მაქსიმუმის გაღება მოუწევს.
ამის შესახებ, Daily Telegraph-ი იტყობინება.
“შემიძლია ვთქვა, რომ “მანჩესტერ იუნაიტედში” ჩემი მუშაობის პერიოდში, გუნდის დღევანდელი შემადგენლობა ერთ-ერთი ყველაზე ძლიერია. ჩემს შეგირდებს დიდი პოტენციალი და საკმაო გამოცდილება აქვთ. რაც შეეხება “რომასთან” დაპირისპირებას, მინდა ვაღიარო, რომ ამ მატჩისთვის, ტაქტიკის შერჩევაზე ბევრი ფიქრი გვიწევს. რომაელები დინამიურ ფეხბურთს თამაშობენ და გუნდი შესანიშნავად მოქმედებს კონტრშეტევებზე. ამჟამად, “რომა” გაცილებით ძლიერია, ვიდრე ერთი წლის წინ”, – აცხადებს ფერგიუსონი, რომლის გუნდმა, გასულ წელს, ტურნირის ამავე ეტაპზე რომში 1:2 მარცხის შემდეგ, მოწინააღმდეგეს “ოლდ ტრაფორზე” გამანადგურებელი ანგარიშით, 7:1 სძლია.
ჩემპიონთა ლიგის მიმდინარე გათამაშებაში “რომასა” და “მანჩესტერ იუნაიტედის” პირველი შეხვედრა დღეს, სტადიონ “ოლიმპიკოზე” გაიმართება, საპასუხო მატჩი კი მანჩესტერში, 9 აპრილს შედგება.