ინგლისური “მანჩესტერ იუნაიტედის” ფორვარდი უეინ რუნი იმედოვნებს, რომ ჩემპიონთა ლიგის ფინალური მატჩი სანახაობრივი გამოდგება და გულშემატკივრებს სიამოვნებას მიანიჭებს. “ჩელსისთან” მომავალ დაპირისპირებაზე მანჩესტერელთა შემტევმა მოსკოვში, რუს ჟურნალისტებთან ისაუბრა. - მეტად მნიშვნელოვანი მატჩი გველის, რომელიც ჩვენგან მაქსიმალურ კონცენტრაციას მოითხოვს. გამარჯვების მისაღწევად ყველაფერი უნდა გავიღოთ. - რომელ გუნდს აქვს მეტი შანსი? - ორივე გუნდი შესანიშნავი ფეხბურთელებითაა დაკომპლექტებული. “ჩელსის” ჰყავს ლამპარდი, ჯო კოული, დროგბა... ეს ფეხბურთელები ყოველთვის მზად არინ ბრძოლისთვის. - იმის გათვალისწინებით, რომ “მანჩესტერ იუნაიტედმა” “ჩელსის” ინგლისის ჩემპიონატში აჯობა, თქვენი აზრით, ფსიქოლოგიური უპირატესობა ვის მხარეს იქნება? - ვფიქრობ, ფსიქოლოგიურად ჩვენ უფრო თავისუფალნი ვიქნებით. თუკი “ჩელსი” ამ მატჩში გამარჯვებას ვერ შეძლებს, სეზონს ტიტულის გარეშე დაასრულებს. ამან მოწინააღმდეგეზე დამატებითი ზეწოლა უნდა მოხდინოს, რაც ჩვენ ცოტა დაგვეხმარება. იმედი მაქვს, თამაში ინგლისურად გახსნილი, სანახაობრივი იქნება და ფეხბურთის მოყვარულები სიამოვნებას მიიღებენ. - მოწინააღმდეგე გუნდში თქვენს ნაცნობებს უკვე ესაუბრეთ? - ახლა ამის დრო არ არის. ორივე გუნდი მხოლოდ მომავალი მატჩისთვის მზადებით არის დაკავებული. ოთხშაბათის შემდეგი კი ვისაუბრებთ.
