ინგლისური “მანჩესტერ იუნაიტედის” პორტუგალიელ ნახევარმცველ კრიშტიანუ რონალდუს ევროპული სეზონის საუკეთესო ბომბარდირისთვის განკუთვნილი პრიზის – “ოქროს ბუცის” მოპოვება ფაქტობრივად გარანტირებული აქვს. ამის შესახებ უეფას ოფიციალური ინტერნეტ-გვერდი იტყობინება. პორტუგალიელმა ფეხბურთელმა ინგლისის ჩემპიონატში აწ უკვე დასრულებულ სეზონში 31 გოლის გატანა შეძლო და ევროპის ეროვნული ჩემპიონატების ბომბარდირთა დავაში მის ანგარიშზე 62 ქულა ირიცხება. იმის გათვალისწინებით, რომ წამყვანი ქვეყნების ჩემპიონატები გასულ უქმეებზე დასრულდა და ბომბარდირებიც გამოვლინდნენ, ერთადერთი ფეხბურთელი, რომელსაც რონალდუს გადასწრების თეორიული შანსი რჩება “სელტიკის” ფორვარდი სკოტ მაკდონალდსია, თუმცა მას ამისათვის, დარჩენილ 1 მატჩში 17 გოლის გატანა სჭირდება, რაც ფაქტობრივად წარმოუდგენელია. ამაგვარად, რონალდუ უკვე შეძლება ჩაითვალოს “ოქროს ბუცის” მფლობელად. 2007/2008 წლების ევროპული სეზონის საუკეთესო ბომბარდირდირთა სიაში კი ადგილები შემდეგი თანმიმდევრობით განაწილდა: 1. კრიშტიანუ რონალდუ (“მანჩესტერ იუნაიტედი”, ინგლისი) – 31 გოლი (62 ქულა) 2. დანიელ გუისა (“მალიორკა”, ესპანეთი) – 27 (54) 3. კლაას იან ჰუნტელაარი (“აიაქსი”, ჰოლანდია) – 33 (49,5) 4-7. ემანუელ ადებაიორი (“არსენალი”, ინგლისი) – 24 (48) 4-7. ფერნანდო ტორესი (“ლივერპული”, ინგლისი) – 24 (48) 4-7. ლუკა ტონი (“ბაიერნი”, გერმანია) – 24 (48) 4-7. ლუიშ ფაბიანო (“სევილია”, ესპანეთი) – 24 (48) 8. ალესანდრო დელ პიერო (“იუვენტუსი”, იტალია) – 21 (42) 9-11. დავიდ ტრეზეგე (“იუვენტუსი”, იტალია) – 20 (40) 9-11. კარიმ ბენზემა (“ლიონი”, საფრანგეთი) – 20 (40) 9-11. რის გრიფიტსი (“ლანელი”, უელსი) – 40 (40) ევროპული სეზონის საუკეთესო ბომბარდირის გამოსავლენად, ფეხბურთელის მიერ გატანილი გოლების რაოდენობა ეროვნული ჩემპიონატის სირთულის კოეფიციენტზე მრავლდება. ყველაზე მაღალი კოეფიციენტი – 2,0 ენიჭება ინგლისის, ესპანეთის, იტალიის, გერმანიისა და საფრანგეთის ჩემპიონატებს.
