Main » 2008»მაისი»16 » პრემიერლიგის ჩემპიონები ორ დამატებით მედალს ითხოვენ
პრემიერლიგის ჩემპიონები ორ დამატებით მედალს ითხოვენ
2:34 AM
წლევანდელ ”პრემიერლიგაში” ჩემპიონობისათვის ერთმანეთს რეალურად სამი გუნდი ეცილებოდა ”მანჩესტერ იუნაიტედი”, ”ჩელსი” და ”არსენალი”. საბოლოოდ გამარჯვება ”მანჩესტერელებს” დარჩათ.”პრემიერლიგის” მოგება იოლი არასდროს არავისთვის არ ყოფილა. ამ ჯერზეც ასე მოხდა. ”მანჩესტერის” პირველობა ბოლო ტურში გაირკვა როდესაც ”უიგანი” ანგარიშით 2:0 დაამარცხა. ამ გამარჯვების შემდეგ ”მანჩესტერმა” ზედიზედ მეორე წელს იზეიმა პირველობა.
”მანჩესტერთან” ერთად მისი მთავარი მწვრთნელი ალექს ფერგიუსონი, პრემიერლიგის სეზონის საუკეთესო მწვრთნელად აღიარეს. შოტლანდიელი სპეციალისტი ლიგის მწვრთნელთა ასოციაციამ სცნო საუკეთესოდ და კუთვნილი პრიზი, ინგლისის ეროვნული ნაკრების თავკაცმა, ფაბიო კაპელომ გადასცა.
ალექს ფერგიუსონისთვის, ახლახან დასრულებული სეზონი, “მანჩესტერ იუნაიტედის” სათავეში 22-ე იყო და ამ დროის განმავლობაში, მან გუნდს მეათედ მოაპოვებინა ინგლისის ჩემპიონის ტიტული.
ფერგიუსონს, ლიგის მწვრთნელთა ასოციაციის პრიზი აქამდეც მიუღია, ეს 1999 წელს მოხდა, როცა მან, გუნდთან ერთად, ინგლისის ჩემპიონის ტიტული, ქვეყნის თასი და ჩემპიონთა ლიგა მოიგო.
მანჩესტერელებს ამ საზეიმო მომენტს მხოლოდ ერთი შემთხვევა უშხამავს. მეკარე ტომაშ კუშჩაკისა და მცველ ხერარდ პიკეს გარდა მთელი გუნდი დაჯილდოვდა, რომლებმაც “ოქრო” პრემიერლიგის რეგლამენტის თანახმად, ვერ მიიღეს.
აღსანიშნავია, რომ ინგლისში ოქროს მედლებს მხოლოდ იმ ფეხბურთელებს აძლევენ, რომელთაც პრემიერლიგაში 10 მატჩი ჩაატარეს, ხოლო კუშჩაკმა და პიკემ მონაწილეობა 9 თამაშში მიიღეს.
ამიტომ ინგლისის საფეხბურთო ჩემპიონატის გამარჯვებულმა “მანჩესტერ იუნაიტედმა” პრემიერლიგის ხელმძღვანელობას, გუნდისთვის დამატებით 2 ოქროს მედლის გამოყოფის თხოვნით მიმართა.
